zau-fishan hai falak pe mah-e-mubin
chandni se chamak uthi hai zamin

ho gai hai har ek shai simin
tabish-e-nur ka jawab nahin

khak par sar-basar hai barish-e-nur
ta-ba-hadd-e-nazar hai barish-e-nur

gharq hain nur mein jo dasht-o-daman
phul misl-e-charagh hain raushan

sahn-e-firdaus hai zamin-e-chaman
gul-fishan hai nigah ka daman

lahlahate hain sabz-posh darakht
ho gae hain sharab-nosh darakht