laut bhi aaen agar ab
wo shanasa lamhe

aur main tujh se milun bhi
to dabe lafzon mein

puchhenge sabhi
kin sitaron ki guzargah pe tum pahle-pahal nikle the

kaun si jhil thi wo
jis mein tum pahle-pahal dube the

kaun se ped the wo
jin ke sayon mein

mohabbat ke shagufe phute
itne badle hue haalat ke dorahe par

in sawalon ke jawabaat mein kaise dunga
ajnabi ban ke milunga

to koi puchh na le
ye jo aankhon mein

mohabbat ka rawan hai dariya
us ki kis mauj se

rishta hai shanasai ka
us ko dar kaisa hai ruswai ka

aur agar
tujh se na milne ki qasam khaun

to phir
dil ki har rag se lahu tapkega tanhai ka

main sahe jaunga ye zakhm shanasai ka