kyon na apni hasti-e-nashad ka shikwa karun
ranj-o-gham ghere hon jab mujh ko to main bhi kya karun

meri qismat mein likhi hai khar-e-sahra ki khalish
kis tawaqqo par tamanna-e-gul-e-raana karun

sabr ka phal log kahte hain milega ek din
aah kab tak intizar-e-wada-e-farda karun

kaun karta hai mudawa khatir-e-nashad ka
apni mahrumi ka kis ke samne charcha karun

dil ke daghon ko samajh lun kis tarah gulha-e-tar
gham se kaise saz-o-saman-e-khushi paida karun

gardish-e-dauran se kah do is pe main raazi nahin
chand saat muskura kar umr-bhar roya karun

main azal se darmiyan-e-ranj-o-rahat hun asir
gham ko apnaun ki rahat ko karun to kya karun

ek muddat se pareshan khatir-e-nashad hai
sochta hun para-ha-e-dil ko phir yakja karun

ek haalat par kabhi rahta nahin mujh ko qarar
har sukun ke ba'd ye hai aarzu tadpa karun

wo sukun-e-mustaqil hai ye hai paiham iztirab
zindagani ka gila ya maut ka shikwa karun