us sunahri sham jab mandir ki sidhi par
bichhae dhup odhe chhanw

hum tum sath baithe the
bahut kuchh kah raha tha main

bahut kuchh kah rahi thin tum
bahut kuchh sun rahe the hum

hamari pith ke pichhe to suraj dhal raha tha
par mere shane pe ek suraj tika tha

jis ki jagmag raushni mein
aasman apne waraq par

phir koi dilkash kahani likh raha tha
kal pighalti sham auditorium ki sidhiyon par

hum the aadhe pas aadhe dur
gum-sum sath baithe the

na tum kuchh kah rahi thin aur na main kuchh kah raha tha
ek chuppi thi jise hum sun rahe the

lekin ab ki bar suraj samne hi dhal raha tha
aasman par sham ki parchhaiyan gahra rahin thi

aur tariki falak ke lauh par likkhi hui
ek ek 'ibarat ko mitati ja rahi thi

aasman par wo kahani jo adhuri hi likhi thi
dhire dhire mit rahi thi

aasman nile se kala aur kala ho gaya tha