masarrat ke us lamha-e-be-karan mein ki hum donon lete hue ghas par nile aakash ko dekhte the
tumhein yaad hoga ki tum ne kaha tha

khushi shadmani ki kitni badi aur hasin saltanat mere zer-e-nagin hai
ye makhmal sa toshak-numa sabza

hawa ka ye kaif-e-khumarin
chamakti hui dhup ke garm paiwast bose

falak ki farakhi
fazaon ka ye mehrbana rawayya

aur in sab se badh kar tumhaari mohabbat ka sar-shaar-o-pur-shor ehsas
khudaya masarrat ka ye lamha-e-be-karan mujh ko pagal na kar de

magar aaj jab hum wahin apne manus goshe mein pinhan
usi ghas takhte pe lete hue nile aakash ko dekhte hain

to mahsus hota hai jaise
zamin sirf kante ugati hai

chamakti hui dhup par tir hi tir hain
aasman ek patthar ki sil ki tarah sine par bojh hai

hawaon se dam ghut raha hai
khushi shadmani ki wo saltanat lut chuki hai

aur hum donon dehli se bhage hue do mughal shahzade
kisi ajnabi ghair-maruf basti ki kohna sarae mein

be-khwab karwat badalte
bas is tak mein hain ki kab aankh jhapke aur hum apne sathi ke sine mein khanjar utaren