hans hans ke chhedne ki wo aadat nahin rahi
wo main nahin raha wo masarrat nahin rahi

mera shuur khud hi mera pasban hai
ab manzil-e-hayat mere darmiyan hai

tere liye wo wahshat-e-hosh-azma gai
wo arz subh-o-sham ki wo iltija gai

be-bakiyon ka teri wo dilkash fusun gaya
wo dil bujha wo shauq mita wo junun gaya

agli mohabbaton ki wo tahrir mit gai
nadaniyon ke daur ki taswir mit gai

maddham sa pad gaya hai kuchh ab saz-e-dosti
jab se khula hai mujh pe tera raaz-e-dosti

wo walwale jo dil mein the khamosh ho gae
ek sanehe se mere baja hosh ho gae

jo raaz thi nibah ka wo baat bhi gai
waraftagi-e-shauq-e-mulaqat bhi gai

ab to qadim waza ka ek pas hai mujhe
derina dosti ka kuchh ehsas hai mujhe

kuchh ye nahin ki dard-e-nihan dur ho gaya
main gardish-e-zamana se majbur ho gaya

udta hua sa rang rukh-e-rozgar hai
yani taghayyuraat pe kya ikhtiyar hai