khirman-e-ehsas par bijli giraate jaiye
ishq ke bedar shoalon ko bujhate jaiye

jis ne bakhsha tha zamir-e-ruh ko raaz-e-hayat
han usi andaz se phir gungunate jaiye

barish-e-gham-ha-e-paiham se faza hai sogwar
aap jate hain to dam bhar muskuraate jaiye

ishq ke sine mein maddham ho rahi hai raushni
ek zara is shama ki lau ko badhate jaiye

kha raha hun phir fareb-e-kaenat-e-rang-o-bu
ye naqab-e-wahm aankhon se uthate jaiye