kya ye zaruri hai
hum sari manfi baaten yaad karen

us ne hum se
kab kis mod pe kya chaha tha

hum ne khud-gharzi ke thaal mein
kya kya us ko nazr kiya tha

kis ne jhut se
thoda sa sach qarz liya tha

kis ka jazba
wahm ki un mein ulajh gaya tha

kab tak is la-hasil dukh mein khud ko hum barbaad karen
kya ye zaruri hai hum sari manfi baaten yaad karen

yaaden
be-imkan faza mein

taza hawa bhi la sakti hain
panw kis ka kis raste par ghalat utha tha

kis ne kotahi mani thi
kaun apni zid par aakhir tak ada raha tha

is ka farq dikha sakti hain
kyon phir hum sochon ki koi had koi miad karen

kya ye zaruri hai hum sari manfi baaten yaad karen