main kitni der se
aankhen band kiye baithi hun

jaise sans lene ko
aur zindagi karne ko

koi bahana na mil raha ho
jaise aansu aur dard

be-mani hon
jaise apna wajud

dusron ki zaruriyat ka
ek zariya ho

jaise hansi aur khushi
aur rang-birangi duniya

kisi khwab ka hissa hon
main kab se aankhen band kiye baithi hun

aur yake-baad-digre
kai dhamakon se

kitni duniyaen takhliq ho kar
ujad chuki hain