sai-e-baqa-e-shaukat-e-askandari ki khair
mahaul-e-khisht-bar mein shishagari ki khair

bezar hai kunisht-o-kalisa se ek jahan
saudagaran-e-din ki saudagari ki khair

faqa-kashon ke khun mein hai josh-e-intiqam
sarmaya ke fareb jahan-parwari ki khair

tabqat mubtazil mein hai tanzim ki numud
shahanshahon ke zabta-e-khud-sari ki khair

ehsas badh raha hai huquq-e-hayat ka
paidaeshi huquq sitam-parwari ki khair

iblis khanda-zan hai mazahib ki lash par
paighambaran-e-dahr ki paighambari ki khair

sehn-e-jahan mein raqs-kunan hain tabahiyan
aaqa-e-hast-o-bud ki sanat-gari ki khair

shoale lapak rahe hain jahannam ki god se
bagh-e-jinan mein jalwa-e-hur-o-pari ki khair

insan ulat raha hai rukh-e-zist se naqab
mazhab ke ehtimam fusun-parwari ki khair

ilhad kar raha hai murattab jahan-e-nau
dair-o-haram ke hila-e-ghaarat-gari ki khair