kab se in pahadon ke sine chir chir kar
in ki ragen khoj khoj kar

lal-o-jawahar nikal raha hun
dheron ke dher laga raha hun

ba-zahir bahut khush hun
ki lal-o-jawahar ke ye ambar main ne lagae hain

ba-baatin albatta udas hun
ki wo lal jis ki mujhe talash hai

hanuz meri dastaras se pare hai
dar-asl wo pahad abhi tak

meri aankh se ojhal hai
jis mein wo rag hai

jis rag mein is lal ke
hone ki ummid hai