‘adad riyazi ka
khauf-o-dahshat ka zaida ban ke

khuni panje nikale apna
lahu ka pyasa

chahaar-jaanib se war karta
mohabbaton ko khurach raha hai

ye khel kaisa ki sare jhagde
ye zarb-o-taqsim jam’-o-tafriq

bapa hue nafrat-o-mohabbat ke darmiyan jo
shikast insaniyat ke hisse mein aa gai kyon

ye rat-jagon ka shikar aankhen
labaada-e-khauf mein lipat kar

bhatak rahi hain
khayal ki pechdar galiyon mein

sochti hain
ye khwab dekhen

ya aagahi ka 'azab palkon ke nam likh kar
parind-e-khush-rang khwab ke sab

uda den apni munder se hum