tumhaari tahrir padhte padhte
kahin kahin pe atak raha hun

kahin pe likha hai tum ne shayad
ki mere bare na itna soch

wo shayad ki socho hi likkha hoga
kahin kahin pe likha hai tum ne

ki mujh se dur rakkho zara tum
yaqinan wo duri hi likkha hoga

kahin pe ye bhi likha hai tum ne
main apni manzil tala lun ab

wo shayad talash hi likkha hoga
magar ye sare hi lafz hain dhundle

ki likhte likhte tumhaari aankhon se
dard ke qatre chhalak rahe the

mujhe batao ki aise adhure
likhe hain to

main aise kaise
haqiqaton ka rang de dun

tum hi batao
ye kaise hoga