ye mah-o-sal ki gardish ye meri tanhai
ye zindagi ka safar aur ye aabla-pai

bahut hasin hai ye manzar magar tumhaare baghair
mere wajud pe har dam hai murdani chhai

agarche aam hai fitrat ka husn har jaanib
mere liye to kashish is mein hai na zebai

ye kaenat-o-kawakib ye kahkashan ye shahab
zamin ka ye tasalsul falak ki pahnai

bulandi koh ki sahra ki be-karan wusat
nadi ka shor ho ya bahr ki ho gahrai

nasheb-e-koh mein sabze ka makhmalin bistar
shafaq ka surkh libaada gulon ki ranai

jawar-e-sahn-e-gulistan mein aahuon ka khiram
chaman mein shokh anadil ki naghma-arai

shah-e-nujum ki aamad ki dil-pazir khabar
nasim-e-subh gali kuchon mein suna aai

kiran ka phutna mashriq se ba-sahar-hangam
sukut-e-shab mein sitaron ki bazm-arai

wo mai-kade mein sar-e-sham mai-kashon ka hujum
pilae jam wo saqi ne sab ki ban aai

hasin raat ki sohbat saba ki sargoshi
urus-e-mah chhupi baadalon mein sharmai

jahan bhi husn ki jalwa-numaiyan dekhin
tumhaari yaad meri jaan be-hisab aai