shahr mashhur-e-zamana dekhne aaya hun main
rajdhani teri raana dekhne aaya hun main

kya kahun kaise kahun kya dekhne aaya hun main
didani har ek nazara dekhne aaya hun main

sar-zamin-e-padmani gahwara-e-pratapi bhim
rashk-e-firdaus-e-zamana dekhne aaya hun main

khushnuma jhilon mein larzan jin ka hai aks-e-jamil
un hasin mahlon ka naqsha dekhne aaya hun main

ab bhi baqi jis zamin par hai guzishta azmaten
wo zamin ba-chashm-e-bini dekhne aaya hun main

sarzamin wo jis mein thin ismat se arzan zindagi
kar ke patthar ka kaleja dekhne aaya hun main

jis ki khatir pi gae jam-e-shahadat surma
rajputon ka wo kaba dekhne aaya hun main

jis se baqi aaj tak hai aan rajasthan ki
wo jamal-e-husn-ara dekhne aaya hun main

sarzamin rangi hai jin ki khun se haldi ghat ki
un ki ummidon ki duniyan dekhne aaya hun main

us ki mitti mein hawa mein aab mein kohsar mein
shan-e-khuddari ka jalwa dekhne aaya hun main

thi faza makhmur jin se apne bachpan ki 'habib'
un hasin khwabon ki duniya dekhne aaya hun main