wo ek main hi nahin hun
na jaane kitne hain

jo sochte hain samajhte hain chahte bhi hain
ki phutti hui pahli kiran se bhi pahle

ufuq pe waqt ke chamken
naya sa rang bharen

jo subh ho
to nasim-e-sahar ka sath dharen

samir ban ke bahen
rang-o-bu ki dharti par

gulon se baat karen
har gali se khul khilen

magar ye waqt
ye sahma hua dara hua waqt

ye apne sae se bidka
ye hanpta hua waqt

kabhi idhar ko rawan hai kabhi udhar ko dawan
sapida-e-sahari kya

sawad-e-sham kahan
ufuq pe kuchh bhi nahin

hai bas ek ghaliz dhuan