ammi ki mohabbat milti hai
abbu ki bhi shafqat milti hai

ai mazi tere ek daman se
kya kya mujhe daulat milti hai

bachpan ka zamana tujh mein hai
har lamha suhana tujh mein hai

jo khwabon ko dastak deta tha
wo ahd purana tujh mein hai

nakaami na ye na-shadi thi
be-fikri thi aazadi thi

shahzada tha main armanon ka
ummid meri shahzadi thi

har kina hasad se dur tha main
har aadat-e-bad se dur tha main

masum tabiat thi meri
shaitan ki zad se dur tha main

ye chand khilauna tha mera
ek sapna sunahra tha mera

mutthi mein thi duniya band meri
ye sara zamana tha mera

bachpan ka zamana bit gaya
wo mit gae wo git gaya

'shahzad' ab aksar sochta hun
kya haar gaya kya jit gaya