kash urdu hi mein ho sare dafatir ka hisab
kash taqriren karen urdu mein sab izzat-maab

kab talak rakhiyega angrezi mein talimi nisab
qaum ke bachchon ke haq mein ye hai ek zehni azab

kab talak ye kah ke qismat se rahen hum shikwa-sanj
ranj ka khugar hua insan to mit jata hai ranj

ghaur kije kaise is talim ne paya riwaj
kis liye hami the is ke sahiban-e-takht-o-taj

kaun si dushwariyan thin jin ka socha ye ilaj
thi clerkon ki hukumat ko nihayat ehtiyaj

dars-gahen thin pa angrezi padhe babu na the
daftari gadi chalane ke liye yabu na the

raushni afrang se is mulk mein aai na thi
zauq-e-khidmat ne rag-o-pai mein jagah pai na thi

pet bharne ke liye ye nasiya-sai na thi
aur abhi taswir-e-jaanan hum ne banwai na thi

yani b-a ki sanad sadha sifarish ki nuqul
arziyon ke sath daftar mein na hoti thin qubul

ab ye haalat hai ki roti ek aur bhuke hazar
baith kar parde ke pichhe khinch sakta hai jo tar

wo to ho jata hai munh mein le ke roti ko farar
baqi-manda phir wahi umid-war umid-war

aap is haalat mein is talim ko de kar riwaj
muflisi ka kar rahe hain homeopathic ilaj