nutq ka eajaz hai urdu zaban
waqt ki aawaz hai urdu zaban

jis mein sur hain mukhtalif bhashaon ke
wo anokha saz hai urdu zaban

ye zaban ke sath hai tahzib bhi
qabil-e-sad-naz hai urdu zaban

mail-e-parwaz hai is ka adab
manzil-e-parwaz hai urdu zaban

qaumi yak-jehti se jo paida hui
wo hasin aaghaz hai urdu zaban

gita aur quran ki tafsiren liye
mazhabon ka raaz hai urdu zaban

hindu muslim sikh isai koi ho
sab ki hi dam-saz hai urdu zaban

is ka dushman dushman-e-amn-o-aman
prem ka andaz hai urdu zaban

sab zabanon par chadhi hai 'mauj' ye
is liye mumtaz hai urdu zaban