teri qurbat ki lazzat-e-shirin
jism-o-jaan mein utarti jati hai

chand upar hai nile ambar mein
jhil niche hai aur hum donon

aa mere pas aa yahan shab-bhar
apne jismon ki wadi-e-nau mein

sabz pedon khanakte jharnon ki
naghmagi latif ko dhunden

apni ruhen kasafat-e-gham se
tair uthengi taza zinda

do kanwal ke hasin phulon ke
rup mein dhal ke muskuraengi

aur pariyan hamein sulaen gi
aasman se zamin tak hasti

khwab hai aur khwab-e-awara
jhonke aate hain narm aur taza

donon jismon mein raazdari hai
donon ruhon pe wajd tari hai