ye waqt kya hai kidhar se aata hai kidhar ko jata hai aur is waqt ke shikam se nikalte din aur raat aur in se phutte ghante minute aur second phir in se bante hafte mahine sal aur sadiyan ye banne tutne judne ka amal kab se shurua hua hai kab talak chalega kaun hai jis ne inhen is khidmat par mamur kar rakha hai apni zaban se kuchh kahta na sunta hai bas har-dam masruf-e-amal hai us ne duniya ki takhliq ko dekha hai phir is ke baad is ke ujadne ka tamashai hai is ke daman mein hazaron raaten hazaron kahaniyan hain husn-o-ishq ki tahzibon ke banne bigadne ki zamin ke tukdon ke sajne sanwarne ki suno to sunte raho uruj-o-zawal ki nasheb-o-faraaz ki magar kya daur-e-jadid ke chand aur sitaron par kamand dalne walon ne apne kan band rakhe hain ya itne masruf hain ki unhen sunne ki fursat bhi nahin hai mana ki hum bhi kahani likh rahe hain auron ke liye magar wo kahani aisi ho jise sunate hue waqt ko koi sharmindagi na ho