yar kab dil ki jarahat pe nazar karta hai

yar kab dil ki jarahat pe nazar karta hai
kaun is kuche mein juz tere guzar karta hai

ab to kar le nigah-e-lutf ki ho tosha-e-rah
ki koi dam mein ye bimar safar karta hai

apni hairani ko hum arz karen kis munh se
kab wo aaine pe maghrur nazar karta hai

umr fariyaad mein barbaad gai kuchh na hua
nala mashhur ghalat hai ki asar karta hai

yar ki baat hamein kaun sunata hai 'yaqin'
kaun kab gul ki diwanon ko khabar karta hai


Please share if you liked this!!!