ahl-e-dil jo bhi baat kahte hain
koi raaz-e-hayat kahte hain

un ke gham se hai jawedan warna
zist ko be-sabaat kahte hain

hae wo daur-e-ishq jab aansu
dastan-e-hayat kahte hain

khwab-e-ghaflat mein jo guzarta hai
hum to us din ko raat kahte hain

ishq ki istilah mein gham ko
inqalab-e-hayat kahte hain

jo bhi hain waqif-e-haqiqat-e-dil
dil ko hi kaenat kahte hain

lafz-o-mani mein aa nahin sakti
wo nazar se jo baat kahte hain

mard-e-haq mein to ma-siwa ko bhi
partaw-e-husn-e-zat kahte hain

muddaton ghaur karna padta hai
un se jab dil ki baat kahte hain

kar-gah-e-nuqush-e-ibrat ko
'kaif' sab kaenat kahte hain