chaman ko khar-o-khas-e-ashiyan se aar na ho
kahin guzishta bahaaron ki yaadgar na ho

chamak raha hai andhere mein karobar-e-hayat
nazar nazar ho to jina bhi sazgar na ho

ye zulf-o-rukh ye shab-o-roz ye bahaar-o-khizan
wo silsila hai ki qat-e-nazar bhi bar na ho

bahaar kuchh jo mili rang-o-bu se begana
wo aa gae ki anasir mein intishaar na ho

ye tar-o-pud nizam-e-khirad bikhar ke rahe
junun ba-qadr-e-tajalli jo hoshiyar na ho

ye dar raha hun main takrar-e-mausam-e-gul se
mita hua koi aalam phir aashkar na ho

ye aarzu hai ki khush-fahmi-e-talab hai 'nushur'
umid kya hai jo duniya umid-war na ho