hazar shama farozan ho raushni ke liye
nazar nahin to andhera hai aadmi ke liye

talluqat ki duniya bhi aadmi ke liye
ek ajnabi sa tasawwur hai ajnabi ke liye

chaman chaman hai mohabbat jahan jahan se jamal
ye ehtimam hai ek dil ki zindagi ke liye

shab-e-nashat mubarak tujhe ye mah-o-nujum
sahar bahut hai meri kam-sitargi ke liye

nigah-e-dost salamat ki faiz-e-girya se
bahut guhar hain mere daman-e-tahi ke liye

nigah-e-mast ki sahba tapak rahi hai 'nushur'
ghazal kahi hai tabiat ki sarkhushi ke liye