khamoshi bohran-e-sada hai tum bhi chup ho hum bhi chup
sannata tak chikh raha hai tum bhi chup ho hum bhi chup

tark-e-talluq kar ke zaban se dil ka jina mushkil hai
ye kaisa aahang-e-wafa hai tum bhi chup ho hum bhi chup

dil walon ki khamoshi hi bar-e-samaat hoti hai
be-awazi karb-e-faza hai tum bhi chup ho hum bhi chup

bhes badalti aawazen hi sham-o-sahar kahlati hai
waqt ka dam kya tut gaya hai tum bhi chup ho hum bhi chup

sakte tak ab aa pahuncha hai badhte badhte karb-e-sukut
honton par kya waqt pada hai tum bhi chup ho hum bhi chup

kaisi narmi kaisi sakhti lahje ki kya baat karen
fikr hi ab gham-karda sada hai tum bhi chup ho hum bhi chup

jab tak rah-e-wafa thi sidhi zor-e-bayan tha aish-e-safar
shayad koi mod aaya hai tum bhi chup ho hum bhi chup