kis harf pe tu ne gosha-e-lab ai jaan-e-jahan ghammaz kiya
elan-e-junun dil walon ne ab ke ba-hazar-andaz kiya

sau paikan the paiwast-e-gulu jab chhedi shauq ki lai hum ne
so tir taraazu the dil mein jab hum ne raqs aaghaz kiya

be-hirs-o-hawa be-khauf-o-khatar is hath pe sar is kaf pe jigar
yun ku-e-sanam mein waqt-e-safar nazzara-e-baam-e-naz kiya

jis khak mein mil kar khak hue wo surma-e-chashm-e-khalq bani
jis khar pe hum ne khun chhidka ham-rang-e-gul-e-tannaz kiya

lo wasl ki saat aa pahunchi phir hukm-e-huzuri par hum ne
aankhon ke dariche band kiye aur sine ka dar baz kiya