yaad aati rahi bhula na sake
shama jalti rahi bujha na sake

chand-tare gul-o-chaman mil kar
dil ki ek dastan suna na sake

aas bandhi thi jin sitaron se
der tak wo bhi jagmaga na sake

naghma kya mutriban-e-ahd-e-jadid
tar tute hue mila na sake

aaj wo rahbar-e-khalaiq hain
khud ko jo aadmi bana na sake

panja-e-gul se bhi ye matwale
daman-e-zindagi chhuda na sake

gham ke mare hue qulub 'nushur'
dard ki sarhadon ko pa na sake