waqt ka mara hua insan raunat ka shikar
jis ki mehnat ka natija azmat-e-sarmaya-dar

asl mein hindostan ka baadshah lekin ghulam
zindagi ki dusri manzil mein hai garm-e-khiram

phir raha hai chilchilati dhup mein diwana-war
baal-bachchon ka tasawwur kar raha hai be-qarar

khun pani ek kar ke dam jab milte nahin
hath phaila kar bhi kya dega koi nan-e-jawin

ibtida hai tisre faqe ki ghar mein kuchh nahin
soch kar kuchh ghar ki jaanib chal pada mard-e-hazin

dekhta kya hai ki bachcha bhuk se hai be-qarar
jaise koi mar kha ke bhagne wala shikar

god mein bithla ke man samjha rahi hai pyar se
aate hi honge tere abba abhi bazar se

us se ye iflas ka manzar na dekha ja saka
be-tahasha chikh mari sar patak kar mar gaya

ek sannata zamin se aasman tak chha gaya
waqt ke mathe pe halka sa pasina aa gaya

haif ai arz-e-muqaddas madar-e-hindostan
tere bachche aur yun ho jaen benam-o-nishan