sab zabanon ki jaan hai urdu
kitni pyari zaban hai urdu

sare alfaz qimti gauhar
jauhari ki dukan hai urdu

ye tarashe hue hasin jumle
jaise hiron ki kan hai urdu

ek ek lafz misl-e-shir-o-shakar
kitni mithi zaban hai urdu

sari duniya mein jis ki shohrat hai
fakhr-e-hindostan hai urdu

khwah hindu ho sikh ho ya muslim
har bashar ki zaban hai urdu

shahr-e-dilli ka sirf dil hi nahin
sare bhaarat ki jaan hai urdu

hyderabad-o-lucknow hi nahin
har jagah ki zaban hai urdu

kitni sadiyan guzar chukin lekin
aaj tak naujawan hai urdu

'kaif' urdu ke jo mukhalif hain
un ke ghar ki zaban hai urdu