shauq kahta hai pahunch jaun main ab kabe mein jald
rah mein but-khana padta hai ilahi kya karun

na tera qurb na baada hai kya kiya jae
phir aaj dukh bhi ziyaada hai kya kiya jae

hamein bhi arz-e-tamanna ka dhab nahin aata
mizaj-e-yar bhi sada hai kya kiya jae [...]

sawal karti kai aankhen muntazir hain yahan
jawab aaj bhi hum soch kar nahin aae

jab bhi khilta hai sar-e-shakh koi taza gulab
tum use tod ke jude mein saja leti ho
jaane kya baat hai tum apne siwa duniya mein
har hasin chiz ko jhunjla ke mita deti ho

sochte sochte phir mujh ko khayal aata hai
wo mere ranj-o-masaib ka mudawa to na thi
rang-afshan thi mere dil ki khalaon mein magar
ek aurat thi ilaj-e-gham duniya to na thi
mere idrak ke nasur to riste rahte
meri ho kar bhi wo mere liye kya kar leti
hasrat-o-yas ke gambhir andhere mein bhala
ek nazuk si kiran sath kahan tak deti
us ko rahna tha zar-o-sim ke aiwanon mein
rah bhi jati wo mere sath to rahti kab tak
ek maghrur sahukar ki pyari beti
bhuk aur pyas ki taklif ko sahti kab tak
ek shaer ki tamannaon ko dhoka de kar
us ne todi hai agar pyar bhare git ki lai
is pe afsos hai kyun is pe tajjub kaisa
ye mohabbat bhi to ehsas ka ek dhoka hai
phir bhi anjaane mein jab shahr ki rahon mein kahin
dekh leta hun main doshiza jamalon ke hujum
ruh par phailne lagta hai udasi ka ghubar
zehn mein rengne lagte hain khayalon ke hujum
sochte sochte phir mujh ko khayal aata hai
wo mere ranj-o-masaib ka mudawa to na thi
rang-afshan thi mere dil ki khalaon mein magar
ek aurat thi ilaj-e-gham-e-duniya to na thi

mujh se pahli si mohabbat meri mahbub na mang
main ne samjha tha ki tu hai to darakhshan hai hayat
tera gham hai to gham-e-dahr ka jhagda kya hai
teri surat se hai aalam mein bahaaron ko sabaat
teri aankhon ke siwa duniya mein rakkha kya hai
tu jo mil jae to taqdir nigun ho jae
yun na tha main ne faqat chaha tha yun ho jae
aur bhi dukh hain zamane mein mohabbat ke siwa
rahaten aur bhi hain wasl ki rahat ke siwa
an-ginat sadiyon ke tarik bahimana tilism
resham o atlas o kamkhab mein bunwae hue
ja-ba-ja bikte hue kucha-o-bazar mein jism
khak mein luthde hue khun mein nahlae hue
jism nikle hue amraaz ke tannuron se
pip bahti hui galte hue nasuron se
laut jati hai udhar ko bhi nazar kya kije
ab bhi dilkash hai tera husn magar kya kije
aur bhi dukh hain zamane mein mohabbat ke siwa
rahaten aur bhi hain wasl ki rahat ke siwa
mujh se pahli si mohabbat meri mahbub na mang