ek-adh sal se hai faza mulk ki kuchh aur
ghaalib sadi ke baad hai gandhi sadi ka daur

gandhi ko kaun aisa hai jo jaanta na ho
izzat ke sath un ko bada manta na ho [...]

rahbar desh-bhagti ka wo
shah tha ek langoti ka wo

pyar ke wo lutata tha phul
tha ahinsa usi ka usul [...]

swaraj ka jhanda bhaarat mein gadwa diya gandhi baba ne
dil qaum-o-watan ke dushman ka dahla diya gandhi baba ne

ulfat ki rah mein mar jaana par nam jahan mein kar jaana
ye path watan ke bachchon ko sikhla diya gandhi baba ne [...]

dard-o-gham-e-hayat ka darman chala gaya
wo khizr-e-asr-o-isa-e-dauran chala gaya
hindu chala gaya na musalman chala gaya
insan ki justuju mein ek insan chala gaya
raqsan chala gaya na ghazal-khwan chala gaya
soz-o-gudaz o dard mein ghaltan chala gaya
barham hai zulf-e-kufr to iman sar-nigun
wo fakhr-e-kufr o nazish-e-iman chala gaya
bimar zindagi ki kare kaun dil-dahi
nabbaz o chaarasaz-e-marizan chala gaya
kis ki nazar padegi ab isyan pe lutf ki
wo mahram-e-nazakat-e-isyan chala gaya
wo raaz-dar-er-mahfil-e-yaran nahin raha
wo gham-gusar-e-bazm-e-arifan chala gaya
ab kafiri mein rasm-o-rah-e-dilbari nahin
iman ki baat ye hai ki iman chala gaya
ek be-khud-e-surur-e-dil-o-jaan nahin raha
ek aashiq-e-sadaqat-e-pinhan chala gaya
ba-chashm-e-nam hai aaj zulekha-e-kaenat
zindan-shikan wo yusuf-e-zindan chala gaya
ai aarzu wo chashma-e-haiwan na kar talash
zulmat se wo chashma-e-haiwan chala gaya
ab sang-o-khisht o khak o khazaf sar-buland hain
taj-e-watan ka lal-e-darakhshan chala gaya
ab ahrman ke hath mein hai tegh-e-khun-chakan
khush hai ki dast-o-bazu-e-yazdan chala gaya
dew-e-badi se mark-e-sakht hi sahi
ye to nahin ki zor-e-jawanan chala gaya
kya ahl-e-dil mein jazba-e-ghairat nahin raha
kya azm-e-sar-faroshi-e-mardan chala gaya
kya baghiyon ki aatish-e-dil sard ho gai
kya sarkashon ka jazba-e-pinhan chala gaya
kya wo junun-o-jazba-e-bedar mar gaya
kya wo shabab-e-hashr-badaman chala gaya
khush hai badi jo dam ye neki pe dal ke
rakh denge hum badi ka kaleja nikal ke