ye intiqam hai ya ehtijaj hai kya hai
ye log dhup mein kyun hain shajar ke hote hue

jine ka haq samraj ne chhin liya
uttho marne ka haq istimal karo

zillat ke jine se marna behtar hai
mit jao ya qasr-e-sitam pamal karo [...]

shahr ke andhere ko ek charagh kafi hai
sau charagh jalte hain ek charagh jalne se

zindagi nach ki har lamha hai jannat-ba-kanar
dekh ye lab hain ye aankhen ye gulabi rukhsar

phir na aaegi palat kar teri duniya mein bahaar
aaj ki raat ghanimat hai charaghan kar len [...]

dabegi kab talak aawaz-e-adam hum bhi dekhenge
rukenge kab talak jazbaat-e-barham hum bhi dekhenge
chalo yunhi sahi ye jaur-e-paiham hum bhi dekhenge
dar-e-zindan se dekhen ya uruj-e-dar se dekhen
tumhein ruswa sar-e-bazar-e-alam hum bhi dekhenge
zara dam lo maal-e-shaukat-e-jam hum bhi dekhenge
ye zoam-e-quwwat-e-faulad-o-ahan dekh lo tum bhi
ba-faiz-e-jazba-e-iman-e-mohkam hum bhi dekhenge
jabin-e-kaj-kulahi khak par kham hum bhi dekhenge
mukafat-e-amal tarikh-e-insan ki riwayat hai
karoge kab talak nawak faraham hum bhi dekhenge
kahan tak hai tumhaare zulm mein dam hum bhi dekhenge
ye hangam-e-wida-e-shab hai ai zulmat ke farzando
sahar ke dosh par gulnar parcham hum bhi dekhenge
tumhein bhi dekhna hoga ye aalam hum bhi dekhenge

darbar-e-watan mein jab ek din sab jaane wale jaenge
kuchh apni saza ko pahunchenge, kuchh apni jaza le jaenge
ai khak-nashino uth baitho wo waqt qarib aa pahuncha hai
jab takht girae jaenge jab taj uchhaale jaenge
ab tut girengi zanjiren ab zindanon ki khair nahin
jo dariya jhum ke utthe hain tinkon se na tale jaenge
katte bhi chalo, badhte bhi chalo, bazu bhi bahut hain sar bhi bahut
chalte bhi chalo ki ab dere manzil hi pe dale jaenge
ai zulm ke mato lab kholo chup rahne walo chup kab tak
kuchh hashr to un se utthega kuchh dur to nale jaenge