khabar-e-tahayyur-e-ishq sun na junun raha na pari rahi
na to tu raha na to main raha jo rahi so be-khabari rahi

shah-e-be-khudi ne ata kiya mujhe ab libas-e-barahnagi
na khirad ki bakhiya-gari rahi na junun ki parda-dari rahi [...]

karen hum kis ki puja aur chadhaen kis ko chandan hum
sanam hum dair hum but-khana hum but hum barahman hum

ai meri jaan-e-arzu mane-e-iltifat kya
hoga na waqf-e-dil kabhi kaif-e-tabassumat kya

mast-e-nazar agar nahin saghar-e-dil mein baada-rez
bazm-e-nawazishat kya daur-e-tawajjohat kya [...]

laya hai mera shauq mujhe parde se bahar
main warna wahi khalwati-e-raaz-e-nihan hun

ghaflat ajab hai hum ko dam jis ka marte hain
maujud hai nazar mein jis ko pukarte hain

hum aaina hain haq ke haq aaina hai apna
masti mein apni har dam dam haq ka marte hain [...]

apna pata mujhe bata bahr-e-khuda tu kaun hai
tujh pe hain sare mubtala bahr-e-khuda tu kaun hai

nam-e-khuda suna kiya tere siwa nahin mila
sari sifat se hai bhara bahr-e-khuda tu kaun hai [...]